УДМУРТ ӘҘӘБИӘТЕ. Башҡортостанда тыуып үҫкән удмурт яҙыусыларының ижады У.ә. ҙур урын алып тора: Р.Г.Вәлишин, Ф.П.Пукроков, У.Ш.Бәҙретдинов, Р.О.Хәйҙәровһ.б. Уларҙың бер ни тиклем әҫәрҙәре башҡ. темаһына арналған. Бәҙретдиновтың “Шордин” (2000), Вәлишиндың “Елдәр тауы” (“Гора ветров”; 1978) повестарында, Пукроковтың “Шишмә” (“Родник”; 1984) шиғри романында тыуған яҡ, унда йәшәүселәр һүрәтләнгән. Башҡ. һәм удмурт халыҡтарының уртаҡ тарихи яҙмышы Удмуртияның башҡа яҙыусылары ижадында ла сағыла. М.А.Коноваловтың “Ғаян” (“Гаян”; 1936) романының төп геройы – Салауат Юлаевтың көрәштәше. С.А.Самсоновтың “Кама өҫтөндә йәшен гөрһөлдәй” (“Над Камой гремит гроза”; 1968) повесында башҡорт һәм удмуртарҙың совет власын урынлаштырыу өсөн бергәләп көрәшеүе күрһәтелгән. М.П.Покчи‑Петров “Ҡурай” (“Курай”) шиғырында З.Ғ.Исмәғилевтең тыуған иле – Башҡортостанға дан йырлай. Ф.И.Васильевтың “Ҡоштар осора” (“Птиц выпускает”) шиғыры М.Кәримгә арналған. 1999 й. Башҡортостанда яҙыусы һәм журналист А.В.Ғилмаев инициативаһы б‑са удмурт телендә “Ошмес” гәз. сығарыла башлай, уның биттәрендә билдәле удмурт яҙыусылары м‑н бер рәттән яңы яҙыша башлаған (Р.К.Миннекузин, И.М.Сәмиғулова, Т.Г.Харисова һ.б.) яҙыусыларҙың әҫәрҙәре лә баҫтырыла. Башҡ. яҙыусылары С.Агиш, М.Ғафури, М.Кәрим, Ғ.Әмири һ.б. айырым әҫәрҙәре удмурт, А.С.Бутолин, Г.Д.Красильников, Г.С.Симаков әҫәрҙәре башҡорт теленә тәржемә ителгән.

Әҙәб.: Писатели Удмуртии: биобиблиогр. справ. Ижевск, 1963; Взаимосвязи башкирской литературы с литературами народов СССР: библиогр. указ. В 2 ч. Ч.2. Уфа, 1987.

О.Б.Ғилмуранова, С.Ғ.Сафуанов

Тәрж. Р.Ә.Сиражитдинов