“СЫҢҒЫҘХАН”, ижади берекмә. 1990 й. Өфөлә “С.” художество төркөмө булараҡ ойошторола, 1998 й. алып хәҙ. статусын йөрөтә. Ойоштороу инициаторы – Н.С.Латфуллин (1992 й. тиклем етәксе). 1990 й. составына Латфуллин, В.М.Ханнанов (1992 й. алып етәксе), Р.З.Харисов, И.Х.Әхмәтвәлиев, Р.Х.Әхмәтвәлиев; һуңынан Н.Ғ.Байбурин, И.Ғ.Бикбулатов, Р.Г.Вәлиәхмәтов, Р.З.Ғарифуллин, М.И.Дәүләтбаев, Р.Р.Моратшин, М.М.Мөхәмәтов инә. “С.” тәүге күргәҙмәһе Ленинградта (1990), артабан Ҡазан, Вена, Зальцбург (Австрия; бөтәһе лә — 1992) ҡҡ. була.

“С.” Рәсәйҙең төрлө төбәктәрендә һәм сит илдәрҙә әүҙем ижади эшмәкәрлек алып бара: 1992 й. Латфуллин үлгәндән һуң уның күргәҙмәһе ойошторола (Өфө); 1994 й. “С.” “Туран” халыҡ-ара фондтың (Ҡазан) 1‑се пр. лайыҡ була, Мәскәүҙә берекмәнең Р.Х.Нуриевҡа арналған “Айҙың татлы хялдары” күргәҙмәһе үтә; 1996—2002 йй. “С.” “АртМанеж” күргәҙмә‑йәрминкәләрҙә (Мәскәү) ҡатнаша; 1999 й. Ғарифуллин, Ханнанов, Р.Х.Әхмәтвәлиев “Евро-Арт” күргәҙмәһендә (Барселона ҡ., Испания) эштәрен күрһәтә.

“С.” — Башҡортостанда тәүге перформанстарҙы ойоштороусы: “Наурыҙ байрамы”, “Гравицаппа I” (икеһе лә – 1997), “Гравицаппа II”, “Мөбәрәк Наурыҙ” (икеһе лә – 1998), “Сыңғыҙхан принцессалары” (2000, “С.” 10 йыллығына), “Сульде” (2002; бөтәһе лә – Өфө), “Алтын пайцза” (2001) һәм “Пыльтрыш” (икеһе лә – Благовар р‑ны Үрге Ҡарғалы а., 2003), ш. уҡ “Йыуыныу ҡорамы” (Мәскәү, 1999) һ.б.

2001 й. берекмә Өфөлә “Айҙар балҡышы” (“Лидо” компанияһы м‑н берлектә), 2003 й. Мәскәү “Яңы быуын” художество салоны күргәҙмәһендә “Айҙар балҡышы II” проектын тормошҡа ашыра. 2004 й. “С.” ағзалары Анкарала ТЮРКСОЙ ойошмаһы үткәргән ижади лаб. сиктәрендәге халыҡ‑ара йәштәр проектында, 2007 й. Мәскәүҙә һәм РФ‑тың башҡа ҡалаларындағы Рәссамдарҙың үҙәк йорто күргәҙмәһендә һәм 2008 й. Рәсәй художество акад. күргәҙмәһендә ҡатнаша; Өфөлә берекмәнең 15 йыллығына (2005) һәм 20 йыллыҡ (2010) юбилейына “Ретро” күргәҙмәләрен ойоштора. 2005 й. Милли Йәштәр театрында “Гипертекст” инсталляцияһын эшләйҙәр.

“С.” — Өфөлә “Мираҫ” галереяһын (1996; ҡара: Һынлы сәнғәт галереялары) ойоштороусыларҙың береһе, Н.Латфуллин ис. Хәҙ. заман сәнғәте музейын ойоштороусы (2002). 2005 й. алып “Высоко Художественный журнал” (“Юғары художестволы журнал”, 2009 й. башлап йыллыҡ альманах) сығара. Н.Латфуллиндың (2004, 2009), “Сыңғыҙхан” (2008) каталогтары нәшер ителгән. “С.” 50‑нән ашыу күргәҙмә, ижади проекттар, хәйриә художество акциялары ойошторған.

Л.В.Бондаренко

Тәрж. Г.Һ.Ризуанова

Яндекс.Метрика