СПИРИДОНОВ Михаил Григорьевич (28.4.1952, Өфө), рәссам. Рәссамдар союзы ағзаһы (1996). Өфөлә йәшәй һәм эшләй.

Метафизик йүнәлеш вәкиле, әҫәрҙәрендә социалистик реализмға хас булмаған кешеләрҙе, предметтарҙы һәм тәбиғәтте төшөрә. Ҡала ситтәрен һүрәтләгән тәүге пейзаждарында — һағышлы кәйеф (“Өфө ихатаһы”, 1977; “Ҡыштырлау”, 1979), ҡайһы бер эштәрендә ысынбарлыҡты ҡабул итә алмау күҙәтелә (“Ҡыҫҡа ваҡыт арауығындағы сәйәхәт”, 1987). Һуңынан Йыһан нурына һәм серлелегенә мөрәжәғәт итә (“Аҡ юл”, 1993; “Яҡты таң”, 2001), рухи төшөнкөлөк хәлен сағылдыра (“Таныш түгел бәләкәй станция”, 2007). С. картиналарында башлыса яңғыҙ, үҙенә йомолған, тәбиғи булмаған көстәр ихтыярына бирелгән (“Оран”, 1990) йәки тормошта бөтөнләй юғалып ҡалған кешеләр һүрәтләнә (“Юлсылар”, 1992; ҡара: Һынлы сәнғәттә реалистик булмаған ағымдар). 1976 й. алып күргәҙмәләрҙә ҡатнаша. БР һәм РФ ҡалаларында 50‑нән ашыу шәхси күргәҙмәһе ойошторола (1980 й. алып). Эштәре БДХМ, “Мираҫ”, “Урал” галереялары (бөтәһе лә – Өфө), К.А.Савицкий ис. музей (Пенза ҡ.) коллекцияларында, Рәсәй һәм сит илдәрҙә шәхси йыйылмаларҙа һаҡлана.

Әҙәб.: Михаил Спиридонов. Живопись: каталог. Уфа, 1994; Гарбуз А. Современная художественная культура Башкортостана. Уфа, 2007.

И.Н.Оськина

Тәрж. Г.Һ.Ризуанова

 

Яндекс.Метрика