СПИВАКОВ Владимир Теодорович (12.9.1944, Черниковск ҡ., хәҙ. Өфө эсендә), скрипкасы, дирижёр. СССР‑ҙың (1989), РФ‑тың (1999), БР‑ҙың (2014), Әрмән ССР‑ының (1989) халыҡ артисы. Мәскәү консерваторияһын тамамлаған (1967; Ю.И.Янкелевич класы). 1979 й. алып “Виртуозы Москвы” Дәүләт камерный оркестрының ойоштороусыһы, художество етәксеһе һәм баш дирижёры (1990—97 йй. Испанияла эшләй), 1999—2002 йй. Рәсәй милли симфоник оркестрының, 2003 й. башлап Рәсәй Милли филармония оркестрының (бөтәһе лә — Мәскәү) художество етәксеһе һәм баш дирижёры. С.‑скрипкасының башҡарыу манераһына автор идеяһын тәрән аңлау, бай, матур һәм тулы яңғырашҡа өлгәшеү, нескә нюансировка һәм сағыу артислыҡ хас. Репертуарында донъя классиктары һәм хәҙ. заман композиторҙарының әҫәрҙәре. Күренекле дирижёрҙар К.Аббадо, Л.Бернстайн, Л.Маазель, Р.Мути, С.Озава, М.Л. Ростропович, Е.Ф.Светланов, Ю.Х. Темирканов етәкс. оркестрҙар м‑н сығыш яһай. С.‑дирижёрҙың ижады киң билдәле һәм әлегә тиклем башҡарылмаған симфоник әҫәрҙәрҙе үҙенсәлекле интерпретациялау м‑н айырылып тора. 1979 й. Чикаго филармония оркестры (АҠШ) м‑н тәүге тапҡыр сығыш яһай. АҠШ, Бөйөк Британия, Венгрия, Германия, Италия, Францияның билдәле оркестрҙары м‑н дирижёрлыҡ итә. 1994 й. Владимир Спиваковтың Халыҡ‑ара хәйриә фонды булдырыла. Кольмар ҡ. (Франция, 1989) Халыҡ‑ара музыка фестивален, Өфөлә Владимир Спиваков Халыҡ‑ара скрипкасылар конкурсын (2016) ойоштороусы һәм художество етәксеһе, Мәскәү халыҡ‑ара Музыка йортон ойоштороусы һәм уның президенты (2003). М.Лонг һәм Ж.Тибо ис. (Париж, Франция, 1965), Н.Паганини ис. (Генуя ҡ., Италия, 1967), скрипкасыларҙың (Монреаль ҡ., Канада, 1969), П.И.Чайковский ис. (Мәскәү, 1970) халыҡ‑ара конкурстары лауреаты, СССР‑ҙың Дәүләт пр. лауреаты (1989). Халыҡтар дуҫлығы (1993), 3‑сө дәрәжә “Ватан алдында күрһәткән хеҙмәттәре өсөн” (1999), сит ил орд. м‑н бүләкләнгән. 2014 й. Салауат ҡ. С. ис. йәш таланттар музыка мәктәбе асыла.

А.Р.Сабирова

Тәрж Г.Һ.Ризуанова

 

Яндекс.Метрика