СӘНСКЕБАШ СЕЛӘҮСЕНДӘР, сусҡа селәүсендәре, акантоцефалдар (Acanthocephales), умыртҡаһыҙҙар тибы. Сусҡа селәүсендәре класына ҡараған яҡынса 500 төрө билдәле, бөтә Ер шарында таралған. БР‑ҙа 14 төрө табылған. С.с. – паразиттар. Кәүҙәһе муҡса рәүешле, оҙонлоғо 0,5—65 см. Кутикулаһы аҫтында — гиподерманың ҡалын ҡатламы бар. Кәүҙәһенең алғы осо — хужа эсәгенең лайлалы тиресәһенә беркетелеү өсөн ырғаҡлы һурҙыртҡыс томшоҡло. Мускулдары ҡуласалы һәм буй. Эсәге редукцияға бирелгән (осмотроф туҡланыу). Нервылар системаһы мейе төйөнөнән һәм унан сыҡҡан нервыларҙан тора. Айырым енесле, йомортҡа һалыу юлы м‑н үрсей. Төп хужаның фекалиялары м‑н сыҡҡан йомортҡаларҙы ваҡытлы хужалар (бөжәктәр,ҡыҫала һымаҡтар һ.б.) йота, уларҙың тәнендә ҡарышлауыҡтар — акантеллалар барлыҡҡа килә. Умыртҡалыларҙың зарарланыуы ваҡытлы хужаларҙы йотҡанда тормошҡа ашырыла. БР‑ҙа Polymorphus magnus, Polymorphus minutus (ҡоштар паразиттары), Neoechinorhynchus rutili, Pseudoechinorhynchus clavula (балыҡтар паразиттары) ябай төрҙәре осрай. Акантоцефалёз (мәҫ., өйрәктәр полиморфозы) ауырыуын тыуҙыралар.

М.Ғ.Баянов

Тәрж. Г.А.Миһранова

 

 

 

Яндекс.Метрика