СӘНҒӘТ УЧИЛИЩЕҺЫ, 1922 й. Башҡ. музыка техникумы булараҡ асыла, 1926 й. алып Башҡ. сәнғәт техникумы, 1936 й. 2 үҙ аллы уҡыу йортона үҙгәртелә: Башҡ. музыка һәм Башҡ. театр‑художество (1941—45 йй. эшләмәй) уч‑щелары, 1960 й. башлап улар берләштерелгәндән һуң, Өфө С.у., 2012 й. Өфө сәнғәт уч‑щеһы (колледж). 1997—2005 йй. Сибай ҡ. уч‑ще филиалы эшләй (ҡара: Сибай сәнғәт колледжы). Уҡытыу көндөҙгө формала түбәндәге һөнәрҙәр б‑са алып барыла: вокал сәнғәте, биҙәү-ҡулланма сәнғәте, дизайн, рәсем сәнғәте, инструменталь башҡарыу (халыҡ оркестры инструменттары, ҡыллы, тынлы һәм һуҡма оркестр инструменттары, Рәсәй халыҡтарының милли инструменттары, фп.), музыка тауыш яҙҙырыу оҫталығы, эстрада сәнғәте (эстрада оркестры инструменттары, эстрада йыры), музыка теорияһы, хор м‑н дирижёрлыҡ итеү. Китапханаһы, музейы, 2 концерт залы, күргәҙмәләр галереяһы, видеофонотекаһы, художество‑методик фонды, спорт-һауыҡтырыу комплексы, ятаҡханаһы бар. Уҡыу йорто м‑н Ҡ.С.Дәүләткилдеев, М.А.Зайдентрегер, Н.Я.Инякин, А.К.Кукубаев, М.Ғ.Мортазина, В.Мортазин-Иманский, Ғ.З.Сөләймәнов, А.Э.Тюлькин, М.Г.Файнд, М.Х.Хисмәтуллин һ.б. эшмәкәрлеге бәйле. 11 меңгә яҡын белгес әҙерләнгән (2012). Тамамлаусылар араһында З.И.Бикбулатова, Р.А.Гәрәев, Б.Ф.Домашников, Ә.Ф.Лотфуллин, А.Ҡ.Мөбәрәков, Р.М.Нурмөхәмәтов, К.Й.Рәхимов, М.П.Фоменков һ.б.

Әҙәб.: Троицкая Л.Н., Ахмадиева Р.Р. Уфимское училище искусств. Уфа, 1992.

В.В.Белов

Тәрж. Ә.Н.Аҡбутина

 

Яндекс.Метрика