ПОПУЛЯЦИЯ (лат.populus — халыҡ), оҙайлы ваҡыт дауамында билдәле бер терр‑яла үрсеүсе һәм уның башҡа берлектәренән сағыштырмаса айырымланған бертөргә ҡараған заттар төркөмө. Төрҙөң структур берәмеге булып тора, уның эсендә форма һәм төр барлыҡҡа килтергән микроэволюцион процестар бара. П. төп характеристикалары: һаны, тығыҙлығы, йәш, виталитет һәм енси составтар, генетик һәм соц. структура (ҡайһы бер хайуандарҙың П.) һ.б. Популяцион‑генетик законлыҡтарҙы өйрәнеү объекттары булып лаб. хайуандарҙың һәм үҫемлектәрҙең эксперименталь рәүештә төҙөлгән П. булыуы мөмкин. П. — популяциялар биологияһының өйрәнеү предметы. Биотехнологияла, гистологияла, микробиологияла, цитологияла П. тип күҙәнәктең ҡайһы бер органоидтарының берлеген, туҡымаларҙа йәки күҙәнәктәрһәм туҡымалар культураһында күҙәнәктәрҙең бер төрлө төркөмдәрен атайҙар. Башҡорт дәүләт университетында (А.Р.Ишбирҙин, М.М.Ишморатова) үҫемлектәрҙең һирәк төрҙәренең популяциялар экологияһы үҫешә, Биохимия һәм генетика институтында Волга‑Урал төбәге, Кавказ һәм Урта Азия халыҡтары П. генетик структураһы өйрәнелә (Э.К.Хөснөтдинова). Шулай уҡ ҡара: Генетика, Популяциялар биологияһы.

А.Р.Ишбирҙин, М.М.Ишморатова

Тәрж. Г.А.Миһранова 

 

 

 

Яндекс.Метрика