НИКАНДРОВ Сергей Иванович (1894—1944, Өфө), сценограф. Мәскәү рәсем сәнғәте, һәйкәл ҡойоу һәм төҙөү сәнғәте уч‑щеһын тамамлаған (1910 йй.). 1919 й. алып Өфө клубтарында үткәрелгән күмәк тамашаларҙа, Үрнәк татар-башҡорт театрында биҙәүсе рәссам, 1922—42 йй. БАДТ‑ла рәссам. Башҡ. сценографияһында иң оло вәкилдәрҙең береһе. Башҡорт драма театрында һәм Башҡорт Күсмә театрында 100‑ҙән ашыу спектаклде биҙәй: тарихи темаға арналған постановкаларҙа (М.А.Буранғоловтың “Ашҡаҙар”, Ф.М.Сөләймәнов, Д.Юлтый һәм В.Мортазин-Иманскийҙың “Салауат һәм Пугачёв”, “Башҡорт туйы” һ.б.) милли көнкүреш аксессуарҙарын; рев‑цияға (М.Ғафуриҙың “Ҡыҙыл йондоҙ”, Д.А.Фурмановтың “Фетнә” романы б‑са ш. уҡ исемле спектакле, И.К.Микитенконың “Диктатура”), коллективлаштырыу һәм индустриялаштырыуға арналған постановкаларында (В.М.Киршондың “Рельстар геүләй” — “Рельсы гудят”, А.М.Таһировтың “Завод”) конструктивизм алымдарын һәм плакат‑схематик образдарҙы; классик репертуар постановкаларында (А.Н.Островскийҙың “Төшөмлө урын” — “Доходное место”, “Бирнәһеҙ ҡыҙ” — “Бесприданница”, М.Горькийҙың “Егор Булычов һәм башҡалар” — “Егор Булычов и другие”) театраль-биҙәү сәнғәтенең традицион һынландырыу принциптарын ҡуллана. 30‑сы йй. 2‑се ярт. БАДТ‑ының техник бүлеге мөдире була, башлыса спектаклдәрҙе биҙәүҙә инженер-конструкторлыҡ мәсьәләләре өҫтөндә эшләй. Урыҫ драма театры м‑н хеҙмәттәшлек итә. 1920 йй. алып күргәҙмәләрҙә ҡатнаша. Эштәре БАДТ музейында һаҡлана.

 

Л.В.Бондаренко

Тәрж. Г.Һ.Ризуанова

Текст на русском языке

 

Все права на материалы сайта охраняются в соответствии с законодательством РФ, в том числе об авторском праве и смежных правах.

ГАУН РБ “Башкирская энциклопедия” © 2015—2018